Cristina Iglesias : «A satisfacción de axudar é impagable»

La Voz de Galicia

Leva case un ano á fronte da Asociación Socioculutural de Discapacitados Sobre Rodas, con 704 socios. O obxectivo é atender as necesidades de nenos e adultos, e as dos seus coidadores

ANA F. CUBA
CEDEIRA /

A recompensa «é impresionante» cando, tras semanas ou meses de xestións, «consegues algo, como material ortopédico para un socio». «A satisfacción persoal de axudar é impagable», recoñece Cristina Iglesias Pérez (Cedeira, 40 anos), presidenta da Asociación Sociocultural de Discapacitados Sobre Rodas desde hai case un ano. «Antes estaba de secretaria, como dicía a miña nai [a anterior responsable do colectivo, Malena Pérez], eu era a cabeza pensante e ela o foco visible», comenta. Agora correspóndelle a ela o primeiro plano. Retirada por unha incapacidade, coñece de preto o problema. «Vivino de xeración en xeración e iso dáche outra perspectiva -confesa-, a min e incluso á miña filla, ten 19 anos e estuda atención a persoas con dependencia».

O colectivo conta con 704 socios, de Cedeira e algún de Valdoviño. «Ao ter servizo de transporte adaptado, exclusivo para socios, foise ampliando. Os usuarios adoitan colaborar nos gastos de combustible, se non sería inviable», explica. A entidade finánciase coas cotas anuais, de 20 euros, os donativos de empresas privadas, o copago dalgunhas actividades e a achega do Concello de Cedeira. Dependendo do ano, reciben subvencións da Deputación (para talleres) ou da Xunta (de carácter individual, para gastos de rehabilitación, tramitadas a través da asociación).

Actividades para todos

«Englobamos a todo tipo de discapacitados», recalca a presidenta. En nómina teñen unha auxiliar administrativa (na oficina do Palacete Municipal) e unha diplomada en Maxisterio, que imparte as clases de reforzo (a escolares remitidos directamente desde o colexio). O resto son voluntarios ou autónomos. Sobre Rodas ofrece servizos de logopedia, psicoloxía e quiromasaje; clases de zumba adaptado, baile para mellorar a mobilidade infantil, estafe training (exercicios específicos para fortalecer a musculatura) ou ximnasia terapéutica. Hai pouco que introduciron sesións de ioga e relaxación, con moi boa resposta.

«O material ortopédico facilita a vida da persoa con discapacidade e dos coidadores»

O préstamo de material ortopédico é un dos servizos «máis importantes», no que invisten boa parte dos seus recursos. «Cédese ao socio que o necesita polo tempo que o necesite, grachíoamente. É unha prioridade para facilitarlle a vida tanto á persoa con discapacidade como aos seus coidadores», remarca. As 16 camas de hospital dispoñibles están en uso, igual que os guindastres, as cadeiras de váter e de ducha, as cadeiras de roda, as muletas e case todos os andadores. «Hai moita demanda», apunta.

Local na avenida de España

A ampliación da escola infantil obrigoulles a mudarse e as actividades, interrompidas agora pola crise sanitaria, desenvólvense nun baixo da avenida de España. A responsable do colectivo agradece o apoio dos propietarios: «Desde o primeiro momento dixéronnos que, mentres non o teñamos todo listo, non nos cobran o alugueiro». En canto insonoricen unha das aulas (e normalícese a situación xeral) poderán retomar tamén as sesións de bicicleta indoor.

Transporte adaptado

Antonio Carro (Régoa-Cedeira, 79 anos) é un dos cinco voluntarios do servizo de transporte adaptado de Sobre Rodas, cun vehículo financiado pola Obra Social a Caixa (12.000 euros) e o Concello (4.700, para a plataforma elevadora). «Levo dez anos, souben disto de casualidade», conta. Destaca a boa relación entre eles: «Facemos quendas de seis días seguidos, e se un día a un non lle convén vai outro, son moi bos compañeiros». Recollen aos usuarios (catro prazas e unha cadeira de rodas) na súa casa, lévanos á consulta ou a rehabilitación, esperan e devólvenos ao domicilio.

«Temos un servizo de 24 horas ao día, 365 días ao ano», subliña este camioneiro xubilado. A maioría das viaxes son a Ferrol ou A Coruña, pero tamén hai desprazamentos a Santiago ou Lugo. «Hai veces que temos unha viaxe pola mañá e outra pola tarde, e se fai falla acompañamos á persoa no hospital. E como temos unha autovía estupenda a Ferrol, sobre todo nas curvas de Landeira -ironiza-, sempre tes que saír cunha marxe de tempo».

Durante unha tempada eran só dous condutores. Antonio chegou a quedar só e tivo que trasladar a un socio durante 29 días seguidos a un hospital coruñés. «Saiamos ás seis da mañá», recorda, contento de poder axudar a veciños que o necesitan.

Link: http://www.lavozdegalicia.es

Esta entrada foi publicada en Asocia. "SobreRodas", Cedeira, Comarcas, Fotos de Cedeira, Fotos Galicia, Politica, Politica Local. Ligazón permanente.

Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Google photo

Estás a comentar desde a túa conta de Google. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

Conectando a %s

This site uses Akismet to reduce spam. Learn how your comment data is processed.