ORTIGUEIRA / LA VOZ
Hai locais que limitan servizos e aforos por falta de man de obra en cociña e sala, e outros seguirán o mesmo camiño se non atopan profesionais
Nas redes sociais e nos propios locais empezan a asomarse os anuncios de procura de persoal. A hostalería de Ferrolterra e Ortegal xa emprendeu a cada vez máis tediosa tarefa de atopar camareiros, cociñeiros ou axudantes de cociña, pensando na Semana Santa, a comezos do mes de abril, e na campaña de verán. «Vai haber problemas, porque o traballo vai a máis e non hai xente», vaticina José Manuel Fernández, á fronte do restaurante Vilavella, en Cedeira. Este hostaleiro xoga con vantaxe porque o seu establecemento abre todo o ano. «Levo unha tempada cun equipo marabilloso, a maioría indefinidos, é xente que traballa moi ben. Toco madeira para que non me fallen os do verán», sinala.
Contar cun persoal estable supón unha garantía, aínda que se necesiten reforzos en xullo e agosto. «Somos seis todo o ano. No verán engadimos xente, pero válenos sen experiencia porque entre todos ensinámoslles», apunta Lorena Martínez, encargada do restaurante A Mariña, do Barqueiro (Mañón), que arrendou hai algo máis de dous anos. Ten un posto por cubrir. Igual que Casa A Madriña, en Taraza (Meirás, Valdoviño). «Faime falta unha persoa para os meses de xullo e agosto. No inverno manteño a dous empregados para as fins de semana e os festivos», comenta María José Vilar, propietaria do negocio.
Un bo servizo
Vilar sostén que o sector está deostado e admite que «pode haber algún explotador», pero insiste en que hoxe, «o traballador ten a tixola polo mango», porque a lexislación ampáralle e porque a demanda laboral excede con fartura a oferta. «*Á xente tes que pagarlle e tes que darlle días libres, e iso téñeno que pagar vos clientes. Non por ter menos prezo vas ter máis vendas, para ter clientes tes que dar un bo servizo», sentenza Jesús Manuel Pigueiras, da Cabana do Fos, en Morouzos (Ortigueira).
En tempada baixa, este restaurante funciona de xoves a domingo —«permítenos darlle unha continuidade ao persoal»— e once días seguidos en Semana Santa. Durante o Festival Celta contrata extras, «para vos días centrais, porque está aberto as 24 horas». Son profesionais de Vegadeo, Ourense ou Santiago, que lle permiten salvar o seu particular top 4, xornadas intensivas dentro dun verán «que cada vez comeza antes e remata máis tarde». A afluencia de visitantes non para de crecer e supón un desafío en tempos de escaseza de man de obra, nin cualificada nin leiga.
«É a mesma historia todos os anos, o verán pasado houbo noites que estaba eu soa para servir e ao final tivemos axuda de xente que viña de vacacións, uns días durante unhas horas», explica María José Armada, unha das responsables da Muller Mariña, en Porto de Bares (Mañón). A partir de agora necesitan un camareiro para as fins de semana, e cara ao verán, máis reforzos para a sala. «Para cociña sabemos dalgúns, pero sen saber con canto persoal vas contar para o comedor e a terraza non podes contratar xente para a cociña», argumenta.
Armada non ve unha solución, polo menos a curto prazo: «Non é só aquí, en Viveiro pasa o mesmo… é coma se a hostalería estivese mal mirada». Tampouco parece sinxelo recorrer a xente de fóra, en parte polos problemas de aloxamento: «É unha opción… se viñesen teriamos que mirar de alugar unha casa para eles, porque se non no verán aquí é imposible, porque non hai vivendas libres e polos prezos».
Botar man da familia
A poucos metros da Muller Mariña está o restaurante A Mariña, pechado ata Semana Santa. «Necesito persoal para cociña [cociñeiro e axudante] e sala», indica Beatriz Mariña, á fronte deste establecemento familiar con máis dun século de historia. O verán de 2022 soportouno a duras penas, tirando dunha das súas sobriñas, cargando horas ás súas costas «e a metade dos días, sen dar ceas». A maiores de retirar mesas do comedor e de manter pechada a terraza, por non poder atendela.
Na Goleta, no Barqueiro, tamén reduciron o aforo e suprimiron as ceas presenciais o verán pasado. Pola tarde-noite só servían comida para levar. No inverno tampouco teñen operativo o comedor e preparan pratos para recoller, as fins de semana, ao mediodía e pola noite. «En Semana Santa abriremos, conto cunha persoa para cociña, á parte de Maribel, que leva comigo 28 anos, e eu, e dous ou tres para o comedor», apunta Ana Domínguez, que comanda os fogóns desde que se inaugurou, fai xa tres décadas.
A situación complícase na zona costeira cara á Semana Santa e ao verán, pero os hostaleiros de contornas urbanas, menos condicionados pola estacionalidade, tampouco o teñen fácil para conseguir profesionais. José López, de Hostalería López e Dopico, con dous locais en Narón, o Café do Alto e o 17 de San Andrés, busca polo menos un camareiro. «Currículos chéganche, pero de xente que non sabe traballar, e non podes pagarlle a alguén como profesional se non o é», recalca. Se non logra contratar a ninguén con experiencia, reducirá horarios: «Antes quedábame sen unha persoa e subíame a tensión, agora tómoo doutra maneira».
novasdecedeira 