Jorge Salgado reside dende fai algo máis dun ano en Trondheim (Noruega)
Puido constatar que realizar unha tese doutoral conleva empregar “todos os teus coñecementos” pero tamén hai outro tipo de implicación a nivel emocional “que acaba sendo inevitable”. Por iso, para o cedeirense Jorge Salgado Beceiro o premio da Cátedra Hijos de Rivera-UDC á mellor tese en desenvolvemento sostible supón tamén “o recoñecemento ao mérito de todas esas persoas que me rodearon durante estes tres anos, sen as cales non fose posible chegar ata aquí”.
Desde fai algo máis dun ano, este químico ao que o interese e curiosidade pola ciencia vénlle desde moi pequeno –do mesmo xeito que o seu vínculo coa música– vive en Trondheim (Noruega), onde continúa a súa traxectoria profesional na recoñecida organización Sintef.
Que aborda na súa tese doutoral “Materiais híbridos orgánicos-inorgánicos con trasnsiciones de fase para arrefriado en estado sólido e almacenamento de enerxía térmica solar”?
A miña tese doutoral céntrase no estudo de novos materiais que poidan ser empregados en refrixeración e almacenamento de enerxía térmica. Un dos aspectos principais é a relevancia da investigación. Actualmente, a maior parte de enerxía consumida a nivel global emprégase en procesos de quecemento e arrefriado, usando para iso tecnoloxías baseadas en combustibles fósiles. Neste contexto, é de vital importancia atopar sistemas que permitan continuar a actividade enerxética dunha forma ecolóxica e sostible. Nesta tese estudáronse unha gran cantidade de novos compostos para tal finalidade; analizando non só a súa síntese senón o seu funcionamento en diferentes condicións para tratar de entender todo o seu potencial uso.
¿Que aspectos destacaría da mesma?
Gustaríame destacar que o mapeado de materiais e técnicas empregadas nesta tese é moi amplo, polo que a contribución científica tamén o é, non só cos “bos” resultados, senón tamén con todos aqueles obtidos de sistemas que poderían funcionar e non o fan. Niso baséase a investigación: facer un bo varrido de posibles solucións, obtendo bos resultados e non tan bos. Un exemplo é que nesta tese só repórtanse catro novos materiais cun alto potencial dun total de case cincuenta candidatos, cuxa maioría non presentaba resultados relevantes.
¿Que pode achegar, desde o seu punto de vista, este proxecto á sociedade?
Nesta tese propóñense diversos materiais con gran potencial para ser usados en refrixeración e almacenamento de enerxía térmica. Estes materiais ofrecen unha gran reversibilidade xerando frío ou almacenando calor á vez que un baixo impacto ao medio ambiente. Polo que, de continuar estudando estes sistemas, poderíanse (nun futuro próximo) chegar a utilizar como sistemas de refrixeración ou almacenamento de enerxía térmica de forma sostible e ecolóxica.
Como valora que unha empresa como Hijos de Rivera aposte, xunto á UDC, por recoñecer este tipo de investigacións?
Na transición enerxética que a sociedade está a vivir, creo que é de gran importancia que a industria aposte polo desenvolvemento sostible. As investigacións científicas básicas son os cimentos do avance tecnolóxico, polo que investir niso supón apostar seguro por un futuro con sistemas ecolóxicos e sostibles.
Máis información ……
novasdecedeira 