Medio Ambiente licita obras de mellora na rede municipal de saneamento de Cedeira

No marco do convenio de colaboración asinado entre o alcalde de Cedeira, Pablo Moreda e a concelleira de Medio Ambiente e Ordenación do Territorio, Beatriz Mato, en xullo de 2016 para tratar de mellorar o tratamento de augas residuais no municipio, Medio Ambiente anunciou onte, a través do Diario Oficial de Galicia, a licitación da primeira fase do proxecto de intervención na rede municipal de saneamento da localidade.

Con cargo a un investimento de 733.650,71 euros, cantidade que será aportada entre o Fondo Europeo de Desenvolvemento Rural e o Ministerio de Agricultura e Pesca, Alimentación e Medio Ambiente, acometerase a construción dunha nova rede separativa de pluviais a fin de liberar os actuais colectores para o transporte exclusivo das residuais.

Esta intervención completarase coa reposición dun tramo do colector que parte do polígono industrial da Xunqueira e descorre en paralelo á ribeira co río, deste xeito, trátase de evitar posibles filtracións ao terreo e aos pozos existentes na zona.

O prazo de execución previsto é de nove meses e as empresas que poidan estar interesadas poderán presentar as súas ofertas ata o día 19 do próximo mes de outubro.

O equipo de goberno Cedirés, que valora moi favorablemente a decisión adoptada pola Xunta, lembra que un dos obxetivo do executivo local para o presente mandato é mellorar o funcionamento da rede de separativa na vila e dotar de saneamento ás parroquias para así contribuír á conservación do medio ambiente e incrementar a calidade de vida da veciñanza.

Esta política, que este ano xa deu lugar á mellora realizada na rúa As Pontes de García Rodríguez, supón unha inversión no seu conxunto de 1.133.500 euros, unha cantidade destiñada á execución dun total de cinco grandes proxectos. Ademais do xa executado, están incluídos os que levarán a cabo nas Pontigas, en Casal de María e Vila do río e nas rúas Paz, Silva e Floreal.

Advertisements