A parella xestionará o negocio, cun persoal de dez persoas e capacidade para 120 comensais JOSE PARDO
Diego Iglesias e Yolanda Cuesta, de Terra do Marisco, reabren o día 12 o local, coñecido aínda por moitos como O Rancho Grande, o seu primeiro nome
Para moitos continúa sendo O Rancho Grande, o nome co que naceu este local da avenida de Castelao a mediados do século pasado, aínda que durante 14 anos, ata o seu peche, en 2023, chamásese A Central. Nesta nova etapa, capitaneada por Diego Iglesias (Cedeira, 1973) e a súa muller, Yolanda Cuesta (Madrid, 1981), o popular establecemento cedeirense denominarase Bon Pé, «unha taberna das de toda a vida, cun punto máis de calidade». Alude ao «bo percebe, ao bo peixe e ao bo produto», e tamén á boa sorte.
Iglesias, xerente de Terra do Marisco, empresa dedicada á venda e exportación de peixes e mariscos, especializada en percebe, levaba tempo con ganas de «montar algo»: «Vexo as carencias que ten Cedeira, onde antes podías comer marisco e peixe… queremos recuperar eso e pechar o círculo. É un reto persoal. Amólame que non quede aquí a boa mercadoría, sendo un porto de mar pioneiro do percebe». Esta parella comprou o edificio e reformou o interior do local, que conta coa terraza exterior (a de sempre) e unha nova na parte de atrás. Nunha segunda fase, planean «facer algo na casa», xa sexa para habilitar un comedor ou apartamentos turísticos.
O Bon Pé abrirá o 12 de xuño, en vésperas de Santo Antonio, festivo local. «Vai poder comer por 20 euros ou por 200», sinalan. Á parte do marisco —os crustáceos móvense xa polo viveiro situado fronte á barra—, servirá peixes, croquetas de lagostino e de xamón ibérico, salpicón ou un par de cortes de carne. «Todo con elaboracións sinxelas, que estraguen o mínimo posible o produto. A clave é o bo xénero», subliñan Iglesias e Costa, que se ocupou da decoración, da man dun deseñador coruñés. A taberna dispón de capacidade para 120 comensais, entre os dous comedores e as terrazas, e conta cun persoal de dez persoas, «pechada e estable para todo o ano, para non ter problemas no verán».
O negocio inicia a súa andaina co horario estival, de 10.00 a 16.00 e de 20.00 a 02.30 horas, con servizo de comidas e ceas (que no inverno restrinxirán aos venres e fins de semana ou festivos). «Por traballo, coñecemos os mellores restaurantes de España, sabemos como funcionan e queremos ofrecer un servizo e un produto ao nivel que se merece Cedeira, que é unha potencia en peixes e mariscos, e non nos/nos gusta ver como se marchan os mellores para fóra», reitera a parella. Algo cansos tras meses de preparativos, afrontan con «nervios e ilusión» este novo desafío laboral.
novasdecedeira 